Dúchas na Gaeilge

Cé air a bhfuil an cúrsa dírithe?

Tá an cúrsa seo dírithe ar dhaoine a bhfuil caighdeán ard acu cheana i dtaca le labhairt agus scríobh na Gaeilge. Beidh sé ag fóirstean dóibh siúd ar mian leo cora cainte dúchasacha na Gaeilge a bheith ar a dtoil acu, Béarlachas a aithint agus a sheachaint, an teanga a shaothrú i réimsí úra dá saol, agus dul i ngleic le mioncheisteanna a bhaineann le cúrsaí stíle agus réime. Bainfidh rannpháirithe atá i ndiaidh freastal ar shainchúrsaí teanga eile de chuid Oideas Gael, amhail le Cruinneas sa Ghaeilge nó Béaloideas Thír Chonaill, tairbhe ar leith as an tseachtain seo.

Ábhar agus cur chuige

Úsáidfear eiseamláirí den dea-chaint agus den deisbhéalaíocht, i bhfoirm téacsanna scríofa agus éisteachta ilchineálacha, mar thaca le clár staidéir idirghníomhaíoch. Seo cuid de na nithe a bheidh i gceist sa chúrsa:

• mionscrúdú ar théacsanna ó chainteoirí dúchais agus ón litríocht i dtréimhsí éagsúla;
• saíocht agus sainghnéithe de thraidisiún liteartha na Gaeilge a aithint;
• saibhriú foclóra, le béim faoi leith ar stór focal a chuidíonn leis an rannpháirtí an Ghaeilge a úsáid i réimsí saoil nua;
• plé agus léirmhíniú ar cheisteanna suimiúla gramadaí, go háirithe iad siúd a bhaineann le réim teanga, débhríocht, agus cruthaitheacht;
• cleachtaí cainte agus scríbhneoireachta a mbeidh idir obair bheirte agus obair ghrúpa iontu.

Stiúrthóir an Chúrsa

Is é Dubhán Ó Longáin a cheap an cúrsa seo agus a bheidh i mbun an teagaisc. Bhronn Ollscoil Uladh dochtúireacht air de thairbhe a chuid taighde ar na laoithe Fiannaíochta. Tá idir fhilíocht agus ghearrscéalaíocht foilsithe ag Dubhán agus duaiseanna aige sa dá réimse. IDEO Locator (2020) an teideal atá ar a chéad chnuasach filíochta agus foilsíodh gearrscéalta agus cuid mhór léirmheasanna leis i ndíolaimí agus i dtréimhseacháin éagsúla. Tá sé ag obair ar chnuasaigh eile faoi láthair.